Струмичкиот бизнисмен Ристо Крмзов е уапсен по налог на обвинител од Основното јавно обвинителство за гонење организиран криминал и корупција (ОЈО ГОКК), соопшти во неделата Министерството за внатрешни работи (МВР).
„Лицето Р.К. е лишено од слобода по насоки на јавен обвинител од ОЈО ГОКК“, се наведува во соопштението.
Истрагата, позната како „Крмзов“, е при крај и се однесува на сомнежи за злоупотреби во поврат на ДДВ во вредност од околу 15 милиони евра. Во ноември 2024, премиерот Христијан Мицкоски изјави дека наскоро ќе бидат објавени детали за предметот.
Во септември минатата година, во координирана акција за даночно затајување, беа претресени деловни простории во Струмица, Скопје и Гостивар. Четири лица беа приведени, а Обвинителството отвори предмет за даночна измама и перење пари. За едно лице беа предложени мерки на претпазливост.
Крмзов, кој се поврзува со фирми од Струмица и се смета за близок до семејството на поранешниот премиер Зоран Заев, е под истрага за учество во шема со повеќе компании. При претресите биле пронајдени дијаманти и поголеми суми пари во готово, пренесуваат медиумите.
Судија во претходна постапка претходно одзеде патна исправа на Крмзов, додека другите приведени беа пуштени без дополнителни мерки. Според државниот јавен обвинител Љупчо Коцевски, ова е прв случај во кој Обвинителството побарало одземање на пасош уште во предистрага.