Алијанса за Албанците изрази загриженост поради, како што ја нарече, „тактиката на одложување“ од страна на Владата и нејзините коалициски партнери во врска со Законот за правична и соодветна застапеност во јавната администрација.
Партијата остро го критикува планот на Владата прво да го испрати законот до Венецијанската комисија на мислење, пред тој да влезе во собраниска процедура. Според Алијансата, овој потег е обид за блокада од страна на ВМРО-ДПМНЕ и партнерите од коалицијата ВЛЕН.
„Станува збор за ризична пракса што може да создаде правен вакуум, во момент кога државата има потреба од јасни гаранции за правично претставување на сите заедници“, соопшти партијата.
Алијансата го повтори својот став дека, според неа, одложувањето е резултат на стратегијата на Владата, а не на поединечни политички чинители како Арбен Таравари. Тие предупредија дека евентуално одолговлекување може да трае и до една година, како што беше случај со Законот за употреба на јазиците, кој беше испратен во Венецијанската комисија во јануари 2019 година, а мислењето беше добиено дури во декември истата година.
Премиерот Христијан Мицкоски во понеделникот изјави дека нацрт-законот е подготвен и ќе биде разгледан на една од следните владини седници, по што ќе биде испратен до Венецијанската комисија.
„Законот е направен внимателно, со консултации од експерти по уставно право. Ќе почекаме мислење од Комисијата, па потоа ќе го внесеме во собраниска процедура,“ изјави Мицкоски, додавајќи дека не е време за поделби и дека треба да се почитуваат уставните категории.
Законот за правична застапеност се разгледува по укинувањето на т.н. „балансер“ – алатка за етничка рамнотежа при вработувања во јавната администрација – од страна на Уставниот суд во 2023 година. Со новиот закон, Владата има намера да воспостави нов механизам за еднаков пристап до вработување за сите заедници.
Алијанса за Албанците го повика Мицкоски и ВМРО-ДПМНЕ веднаш да го поднесат законот во Собранието, предупредувајќи дека секое понатамошно одложување би било „предавство на волјата на албанските гласачи“.