Струковиот синдикат на контролори на летање (ССКЛМ) побара од раководството на М-НАВ да го поништи последниот оглас за нови вработувања и да ги исполни обврските од спогодбата потпишана лани, која доведе до суспендирање на штрајкот.
Во писмено известување до Управниот одбор на М-НАВ, испратено на 16 јуни, ССКЛМ повика на итна реализација на сите неисполнети точки од Спогодбата од 13 јули 2023 година најдоцна до крајот на месецов. Доколку не се постигне напредок, синдикатот најави реактивирање на штрајкот од 10 јули.
Според синдикатот, состојбата во државната компанија за контрола на летање се влошила поради „сериозно нарушени меѓучовечки односи, блокирани јавни набавки, неуспешна транзиција кон нови технички системи, прекршувања на Колективниот договор и спроведување на неосновани измени во систематизацијата“.
ССКЛМ го оцени неодамна објавениот оглас за вработување како „несоодветен на реалните, итни и суштински потреби на компанијата“. Наместо тоа, синдикатот предлага пополнување на потребите преку прераспоредување на постојните кадри, интерни огласи и реорганизација на одделенијата.
И покрај рекордниот пораст на бројот на авионски прелети над македонското небо, синдикатот предупредува дека техничкиот систем е застарен и во „критична состојба“, со реален ризик од отказ. Дополнително, постои недостиг на инженерски кадар и контролори на летање, што според ССКЛМ, го ограничува капацитетот на системот да опслужува повеќе летови – потенцијално до 50% повеќе со новиот систем, кој сè уште не е ставен во функција.
Синдикатот исто така посочува дека нема напредок во инфраструктурните проекти, дека сè уште не е завршена функционалната анализа на компанијата, а над девет месеци М-НАВ нема ангажирана агенција за физичко обезбедување, иако сообраќајот над земјата бележи рекордни нивоа.
М-НАВ, државната компанија задолжена за контрола на воздушниот сообраќај, засега не се има јавно огласено по најавата на синдикатот.