Демократската унија за интеграција (ДУИ) го обвини владејачкото мнозинство дека преку отворање на над 730 јавни конкурси во пресрет на локалните и претседателските избори се обидува да обезбеди политичка поддршка и да ги манипулира граѓаните, во пресрет на, како што велат, „неизбежен пораз во октомври“.
„По една година неуспеси на сите полиња – без реални реформи, без напредок кон ЕУ, без економски развој и со дипломатски дебакли – Владата се обидува да го прикрие неуспехот со вработувања во администрацијата пред избори,“ се наведува во соопштението на партијата.
ДУИ смета дека јавните конкурси, наместо да бидат инструмент за изградба на професионални и функционални институции, се користат како изборен алат за создавање лажен впечаток дека институциите работат. Според партијата, тоа е „уште еден обид за манипулација со граѓаните и обезбедување политичка поддршка преку клиентелизам“.
„Граѓаните не се манипулираат – тие јасно го препознаваат вистинскиот мотив зад овие потези,“ додаваат од партијата.
ДУИ предвидува дека претстојните избори ќе претставуваат „референдум против манипулативната и неспособна политика“ и шанса граѓаните да ја санкционираат, како што велат, „лошата власт, некомпетентноста и ароганцијата“ која, според нив, го држи земјата во стагнација со години.
Партијата заклучува дека „ниту еден недовршен конкурс до изборите нема да го врати изгубеното доверие на граѓаните во власт што ги изневерила нивните очекувања“.