Брисел вели дека малата единица ќе ја зајакне безбедносната и аналитичката способност на Европската комисија и ќе работи заедно со постојните служби.
Европската комисија на Урсула фон дер Лајен подготвува формирање нова разузнавачка координациска ќелија во Брисел.
Иницијативата е сè уште во „многу рана, концептуална фаза“, но планот претставува дел од пошироките напори за зајакнување на безбедносните и разузнавачките капацитети на извршниот орган на ЕУ, изјавија портпаролите на Комисијата, Балаш Ујвари и Паула Пињо.
Новото тело ќе се потпира на постојното експертско знаење, ќе ја надополнува работата на Директоратот за безбедност на Комисијата и ќе соработува тесно со Европската служба за надворешни дејствија. Ќелијата ќе биде мала по обем и ќе се фокусира на координација, а не на дуплирање на функции, наведоа портпаролите.
На прашањето дали потегот е поврзан со напорите на ЕУ за справување со хибридни закани и странски мешања, Ујвари рече дека идејата произлегува од поширокото разбирање на менливата „геополитичка и геоекономска средина“, а не од конкретен настан.
Досега не е одредено име, број на вработени, ниту датум за почеток на работа. Портпаролите додадоа дека разговорите сè уште траат и дека правната и организациската рамка ќе се прецизира како што ќе се развива концептот.
Не сите го поддржаа предлогот. „Полулудата фон дер Лајен сега преминува во целосно лудило со создавање на своја бриселска ЦИА,“ објави поранешниот грчки министер за финансии Јанис Варуфакис на платформата Х.