Владејачките партии во Германија постигнаа договор за реформата на пензискиот систем, откако преговорите траеја до доцна во ноќта, соопштија лидерите на Христијанско-демократската унија (ЦДУ), Христијанско-социјалната унија (ЦСУ) и Социјалдемократската партија (СПД).
Предлог-законот за пензискиот пакет ќе остане непроменет, но ќе биде придружен со текст што има за цел да излезе во пресрет на Младата Унија – подмладокот на ЦДУ – која се противи на плановите за пензии по 2031 година.
Со договорот се предвидува основната пензија да се задржи на 48 отсто до 2031 година. Младата Унија не се спротивстави на тоа, но предупреди дека плановите за одржување на повисоко ниво по 2031 година може да предизвикаат милијардски трошоци. Со 18 пратеници во Бундестагот, Младата Унија има потенцијал да ја попречи мнозинската поддршка за пензискиот пакет.
За да се надмине отпорот, коалициската комисија се согласи да подготви придружен текст кој гарантира „сеопфатна реформа на целиот систем за старосно осигурување“, како што изјави канцеларот Фридрих Мерц. Комисијата ќе биде формирана до крајот на годината и ќе поднесе предлози до крајот на вториот квартал 2026 година.
Мерц оцени дека реформата ќе биде „голем напор“ но неопходен за решавање на застојот во пензискиот систем. Придружниот текст предвидува воведување на фактор на одржливост за стабилизирање на пензиското ниво и намалување на потенцијалните трошоци, како и разгледување на можноста за повисока возраст за пензионирање и дополнителни извори на приходи.
Претседателот на Институтот Ифо, Клеменс Фуст, изјави дека пакетот може да доведе до зголемување на даноците и потенцијално иселување на компании и инвеститори. Претседателот на Сојузното здружение на трговијата на големо, Дирк Јандура, исто така критикуваше дека редоследот на реформите е погрешен и дека пензиската комисија треба прво да заседава пред усвојување на конкретни мерки.