Европската унија може „брзо и решително“ да одговори на „неоправданите“ забрани за визи на САД за пет европски граѓани кои се вклучени во борбата против омраза на интернет и дезинформации, соопшти портпарол на Европската комисија.
Европските лидери, вклучително и францускиот претседател Емануел Макрон, го обвинија Вашингтон за „присила и заплашување“, по воведувањето на забраната за визи на лицата кои беа во срцето на кампањите за воведување закони кои ги регулираат американските технолошки компании.
Американскиот државен секретар Марко Рубио, објаснувајќи ги забраните, напиша на X: „Продолго време, идеолозите во Европа воделе организирани напори да ги присилат американските платформи да казнат американски ставови со кои не се согласуваат. Администрацијата на Трамп повеќе нема да толерира вакви егзтратериторијални актови на цензура.“
Забраните за визи беа наметнати во вторникот врз Тјери Бретон, поранешен комесар на ЕУ и еден од архитектите на Законот за дигитални услуги (DSA), како и четворица активисти против дезинформации, вклучувајќи двајца од Германија и двајца од Велика Британија.
Вашингтон го гледа DSA како форма на цензура, додека европските лидери тврдат дека регулативата е неопходна за контрола на говорот на омраза. Спорот се заканува да стане дел од поширок културен и политички конфликт помеѓу администрацијата на Доналд Трамп и Европа.