Американскиот претседател Доналд Трамп изјави дека Соединетит Американски Држави го „заробиле“ венецуелскиот претседател Николас Мадуро и неговата сопруга и ги извеле од земјата, по, како што рече, „масовни воени напади“ врз Венецуела.
Во објава на платформата Truth Social, Трамп наведе дека операцијата била спроведена „во координација со американските органи за спроведување на законот“, без да понуди дополнителни детали. Белата куќа и Пентагон засега не ја потврдија изјавата.
Претходно, владата на Венецуела ги обвини САД за напади врз цивилни и воени цели во Каракас и во сојузните држави Миранда, Арагва и Ла Гваира, оценувајќи ги како „воена агресија“. Претседателот Мадуро прогласи вонредна состојба на национално ниво.
Сведоци и медиумски извештаи наведуваат дека најмалку седум силни експлозии биле слушнати околу 2 часот по локално време во Каракас, придружени со летови на авиони на мала височина. Чад се издигал над аеродромот Ла Карлота и во близина на воениот комплекс Фуерте Тиуна, најголемата воена база во земјата.
САД засега официјално не ги коментираа нападите. Американската Федерална управа за авијација (FAA) соопшти дека го затворила венецуелскиот воздушен простор за американски комерцијални летови поради „тековна воена активност“.
Колумбискиот претседател Густаво Петро повика на деескалација и предупреди дека секоја еднострана воена акција може да ја загрози цивилната популација и регионалната стабилност. Колумбија, која има долга и порозна граница со Венецуела, соопшти дека ги ставила безбедносните сили во состојба на готовност и активирала хуманитарни механизми за можен бран мигранти.
Кубанскиот претседател Мигел Дијас-Канел ги осуди наводните напади, обвинувајќи го Вашингтон за „криминален акт“ и „државен тероризам“, повикувајќи на итна меѓународна реакција.
Тензиите меѓу Вашингтон и Каракас значително ескалираа во последните месеци, при што администрацијата на Трамп го обвинува Мадуро за вмешаност во трговија со дрога и нелегална миграција. Венецуелската влада ги отфрла обвинувањата и тврди дека САД се обидуваат да извршат „промена на режимот“ заради контролата врз големите резерви на нафта и минерали.