Генералниот секретар на НАТО, Марк Руте, во вторник ќе престојува во официјална посета на Северна Македонија, каде ќе биде примен од претседателката Гордана Сиљановска-Давкова, соопштија од нејзиниот кабинет.
За Руте ќе бидат приредени највисоки државни и воени почести, по што е предвидена тет-а-тет средба со Сиљановска-Давкова и пленарни разговори меѓу македонската делегација и претставници на Алијансата.
Во агендата е вклучена и заедничка прес-конференција на претседателката и генералниот секретар.
Во рамки на посетата, Руте ќе ја посети и Армијата на Северна Македонија, каде по неговото обраќање ќе биде организирана презентација на лесната пешадиска баталјонска група, како и разгледување на дел од опремата со која располага единицата.
На настанот се очекува да присуствуваат министерот за одбрана Владо Мисајловски, началникот на Генералштабот, генерал-мајор Сашко Лафчиски, како и други високи претставници на Армијата и Министерството за одбрана.
Ова ќе биде прва посета на Руте на земјата откако ја презеде функцијата генерален секретар на НАТО.