Дел од европските претставници и аналитичари стравуваат дека остриот судир меѓу лидерите на Европската унија и унгарскиот премиер Виктор Орбан на неодамнешниот самит во Брисел би можел ненамерно да ги зајакне неговите изборни шанси, во пресрет на парламентарните избори во Унгарија, пишува Политико.
Орбан повторно го блокираше клучниот пакет од околу 90 милијарди евра за поддршка на Украина, условувајќи ја поддршката со обновување на снабдувањето со руска нафта преку гасоводот „Дружба“, кој беше оштетен во напад. Киев ги отфрли обвинувањата дека го одложува неговото санирање.
Неколку европски лидери отворено го критикуваа Орбан на самитот, при што шведскиот премиер Улф Кристерсон изјави дека не се сеќава на толку остри критики кон еден лидер на состаноците на ЕУ.
Сепак, некои европратеници предупредуваат дека ваквиот пристап може да му оди во прилог на Орбан, кој со години ја гради политичката реторика околу спротивставување на Брисел и претставување како заштитник на унгарските национални интереси.
„ЕУ требаше да го одложи судирот до по изборите“, изјави за Политико француската европратеничка Клое Ридел, додавајќи дека директната конфронтација му дава можност на Орбан да ја мобилизира својата гласачка база.
Орбан, кој ја води Унгарија повеќе од една деценија, по самитот изјави дека другите лидери „можат само да се закануваат“, додавајќи дека Будимпешта има посилни аргументи во спорот.
Аналитичари велат дека ваквиот конфликт се вклопува во неговата долгорочна стратегија, во која надворешни актери – вклучително и ЕУ – се прикажуваат како закана за земјата.
Поранешниот канадски политичар и академик Мајкл Игнатиеф изјави за Политико дека постои ризик европските лидери да „паднат во стапица“, но додаде дека Орбан со години води кампања против Брисел без оглед на односот на ЕУ.
Во меѓувреме, анкетите покажуваат дека партијата Фидес на Орбан заостанува зад опозициската Тиса, предводена од Петер Маѓар, што укажува на неизвесна изборна трка.
Поддржувачите на Орбан велат дека неговото одбивање да попушти под притисокот од ЕУ може да му донесе политички поени кај гласачите. Сепак, дел од аналитичарите предупредуваат дека евентуална изборна победа постигната во вакви услови може да доведе до дополнителни тензии со Брисел на подолг рок.