Унгарскиот премиер Виктор Орбан изјави дека очекува победа на неговата партија Фидес на претстојните парламентарни избори, нагласувајќи дека кампањата ја водел „врз основа на здрав разум“ и со фокус на реалните предизвици со кои се соочува земјата.
Во интервју за телевизијата АТВ, Орбан рече дека во изминатите недели патувал низ земјата и разговарал со гласачите, додавајќи дека чувствува „внатрешен мир од добро завршена работа“.
Тој истакна дека имал можност да ги претстави ставовите за иднината на државата и изборите што стојат пред граѓаните.
Осврнувајќи се на анкетите, Орбан рече дека резултатите од истражувањето на американската агенција McLaughlin & Associates, кое покажува предност за Фидес, во голема мера се совпаѓаат со интерните мерења на неговата партија.
Во меѓувреме, парламентарните избори во Унгарија, кои ќе се одржат утре, се оценуваат како едни од најважните во Европа во 2026 година, јавуваат медиумите.
Главната трка се очекува да се води меѓу Орбан и неговиот главен опозициски ривал Петер Маѓар, во услови кога теми како војната во Украина, односите со Европската унија и позицијата на Будимпешта кон Русија доминираат во кампањата.
Орбан во повеќе наврати изјави дека гласачите ќе избираат меѓу „војна и мир“, претставувајќи се како гарант за стабилност, додека Маѓар ја критикува владината политика и најавува подобрување на односите со Брисел и Киев.
Околу осум милиони гласачи ќе одлучат дали Орбан ќе остане на власт по повеќе од една деценија или ќе дојде до политичка промена.