Генералниот секретар на Советот за регионална соработка (RCC), Амер Капетановиќ, порача дека регионалната соработка е неопходна за создавање отпорни и инклузивни пазари на труд во Западен Балкан.
Капетановиќ учествуваше на Конференцијата за Западен Балкан „Заедничко унапредување на вработувањето и социјалните политики“, што се одржа во Берлин во рамки на Берлинскиот процес.
Настанот беше организиран од германското Федерално министерство за труд и социјални прашања, а воведни обраќања имаа германската министерка Бербел Бас, црногорската министерка Наида Нишиќ и извршната потпретседателка на Европската комисија, Роксана Минзату.
Капетановиќ учествуваше на панел посветен на стратегиите за отпорни и инклузивни пазари на труд, заедно со министри и претставници од регионот.
Во дискусијата беа отворени прашањата за недостатокот на квалификувана работна сила, високата младинска невработеност, неформалната економија, демографските предизвици и потребата од модернизација на јавните служби за вработување.
„Низ Западен Балкан, пазарите на труд се соочуваат со различни околности, но многу од структурните предизвици се заеднички“, изјави Капетановиќ.
Тој посочи дека стапките на вработеност и економска активност во регионот и натаму се значително под просекот на Европската Унија, додека младинската невработеност и NEET стапките остануваат високи.
„Регионалната соработка не е дополнителен слој на работа, туку практична неопходност“, рече Капетановиќ.
Според него, Берлинскиот процес обезбедува политичка насока, а RCC работи на практична имплементација преку анализи, мониторинг, размена на искуства и конкретни алатки за институциите.
Капетановиќ ја истакна и улогата на Платформата за вработување и социјални прашања (ESAP), преку која земјите од регионот добиваат поддршка за усогласување со европските стандарди и подобрување на политиките за вработување.
Тој нагласи дека алатките како „Benchlearning“ и проектите за борба против непријавената работа им помагаат на институциите да ги споредуваат резултатите, да ги идентификуваат слабостите и да воведуваат конкретни подобрувања.
На конференцијата беше претставен и новиот Работен план на Берлинскиот процес за вработување и социјална политика, кој има за цел да ја засили регионалната соработка во областите на мобилноста на работната сила, развојот на вештини и модернизацијата на службите за вработување.
„На регионот не му недостигаат стратегии или заложби, туку посилна имплементација, поголем опфат и доследност“, изјави Капетановиќ.
Тој порача дека земјите од Западен Балкан самите мора да изградат отпорни пазари на труд, а RCC ќе продолжи да помага преку поврзување на регионалната соработка со европските процеси и стандарди.