Цената на златото е под притисок и покрај геополитичките тензии на Блискиот Исток, бидејќи инвеститорите се повеќе се фокусираат на можноста централните банки да ги задржат или дури да ги зголемат каматните стапки за да ја контролираат инфлацијата.
Златото, кое традиционално се смета за сигурно засолниште во време на кризи, падна од рекордните 5.303 долари за тројска унца на крајот на јануари на околу 4.235 долари во петокот, според пазарните податоци.
Пазарните аналитичари велат дека војната меѓу САД, Израел и Иран довела до раст на цените на енергенсите преку нарушувањата во Ормутскиот Теснец, што дополнително ја зголемило инфлацијата и ги намалило очекувањата за намалување на каматните стапки.
„Златото губи дел од својата привлечност кога каматните стапки се високи, бидејќи не носи принос како обврзниците или депозитите“, изјави Џастин Кардвел од OptionSpreaders.com.
Во САД инфлацијата достигна 4,2 отсто, највисоко ниво во последните три години, додека пазарот на труд останува стабилен, што ги намалува шансите Федералните резерви наскоро да ги намалат каматните стапки.
Дополнителен притисок врз златото врши и посилниот американски долар. Бидејќи благородниот метал се тргува во долари, неговата цена обично се движи во спротивна насока од американската валута.
„Кога доларот зајакнува, златото чувствува притисок. Во моментов доларот е силен и тоа се одразува врз цената на металот“, рече Колин Плум, извршен директор на Noble Gold Investments.
Пазарите внимателно ги следат сигналите од Федералните резерви, откако алатката CME FedWatch покажа дека веројатноста за зголемување на каматните стапки до крајот на годината надминува 50 проценти.
Сепак, најавите за можен мировен договор меѓу САД и Иран во петокот донесоа мало закрепнување на цената на златото, бидејќи инвеститорите очекуваат намалување на инфлаторните притисоци доколку дојде до деескалација на конфликтот.
Аналитичарите предупредуваат дека и по евентуалниот крај на војната, цената на златото ќе остане чувствителна на движењата на каматните стапки, инфлацијата и курсот на доларот.