Повеќе од 1.000 лица се уапсени во меѓународна полициска операција против трговијата со луѓе што опфати 59 држави, при што беа идентификувани над 2.000 жртви или потенцијални жртви, соопшти Интерпол.
Операцијата „Global Chain“, координирана од Интерпол во соработка со Европол и европската агенција за гранична и крајбрежна стража Фронтекс, беше насочена кон криминални мрежи што се занимаваат со сексуална експлоатација, присилна работа, принудно извршување кривични дела и питачење.
Меѓу разбиените криминални групи е мрежа што префрлала жртви во Камбоџа, каде биле принудувани да работат во центри за онлајн измами, како и група што преку социјалните мрежи регрутирала малолетни девојчиња за сексуална експлоатација во Белгија и Франција.
Од вкупно 1.024 приведени, 334 лица се осомничени за трговија со луѓе, а 690 за поврзани кривични дела. Покренати се 465 нови истраги, додека уште 201 осомничен е идентификуван.
Според Интерпол, околу 2.070 лица биле идентификувани како жртви или потенцијални жртви, при што најголемиот дел се жени. Повеќето биле жртви на сексуална експлоатација, 20% биле принудувани на криминални активности, 11% на присилна работа, а 2% на питачење.
Операцијата открила и нов тренд – зголемен број жртви од Латинска Америка кои се пренесуваат во Европа за присилна работа. Околу 10% од идентификуваните жртви биле малолетници од американскиот континент, изложени на сексуална експлоатација.
Во Бразил, федералната полиција идентификувала 406 жртви – 83 бразилски и 323 странски државјани – кои биле пренесувани во Камбоџа за присилна работа во центри за интернет измами.
Во Аргентина беа спасени две деца од Боливија, принудувани да работат во продавница, а во Белгија се уапсени 17 лица осомничени дека преку социјалните мрежи регрутирале жртви, ги држеле во заробеништво и ги принудувале на проституција.
Во акцијата, спроведена од 8 до 12 јуни, учествуваа околу 40.000 припадници на безбедносните служби од Европа, Азија, Африка и Америка, меѓу кои и Велика Британија, САД, Франција, Германија, Шпанија, Нигерија, Тајланд и Виетнам.
Генералниот секретар на Интерпол, Валдеси Уркиза, изјави дека трговијата со луѓе останува една од најпрофитабилните форми на организиран криминал, која секоја година генерира милијарди долари нелегален приход и остава трајни последици врз жртвите. Тој оцени дека резултатите од операцијата ја покажуваат важноста на меѓународната соработка во борбата против транснационалните криминални мрежи.