Австралискиот премиер Ентони Албанезе одби да ѝ се извини на јапонската премиерка Санае Такаичи поради шега за подарок од две јапонски дињи, која неговите политички противници ја оценија како сексистичка и недостојна за функцијата што ја извршува.
Контроверзноста произлегува од гостувањето на Албанезе во сатиричниот подкаст „Bush Deep“ во јули. Зборувајќи за подарокот што го добил од Такаичи, тој рекол дека таа „донела две, како што се прави“, придружувајќи ја забелешката со гестикулација пред градите.
Водителката Ники Озборн потоа се пошегувала дека јапонската премиерка дошла „изгледајќи како Памела Андерсон“.
Опозициските либерали го обвинија Албанезе за непочитување на јапонската премиерка и побараа извинување.
Пратеничката Мери Олдред во парламентот ги нарече неговите коментари „вулгарни, без класа“ и непочитувачки, прашувајќи го премиерот дали ќе се извини.
„Го отфрлам тврдењето содржано во прашањето“, одговори Албанезе.
Тој рече дека Австралија и Јапонија „никогаш не биле поблиски или постратешки усогласени“, посочувајќи на економската, безбедносната и стратешката соработка меѓу двете земји.
Токио не видел „лоша намера“
Случајот доби дополнително внимание откако поранешниот јапонски амбасадор во Австралија, Шинго Јамагами, оцени дека шегата била сексистичка и дека претставувала навреда за Такаичи.
Но, според „Гардијан“, јапонската влада во дипломатска комуникација испратена до Австралија уште во јули оценила дека медиумското известување било сензационалистичко и дека во изјавата на Албанезе не препознала „лоша намера“.
Широ Армстронг од Австралиско-јапонскиот истражувачки центар при Австралискиот национален универзитет, исто така, рече дека случајот со недели речиси и не бил тема во Јапонија, оценувајќи го како „непрашање“ таму.
Австралиската опозиција, сепак, продолжи да бара извинување. Лидерот Ангус Тејлор побара Албанезе да се извини, додека неговата заменичка Џејн Хјум изјавата ја оцени како недостојна за функцијата премиер.
Членови на владата застанаа во одбрана на Албанезе, тврдејќи дека неговите зборови биле погрешно интерпретирани.
Албанезе претходно се извини за друг дел од истото гостување, кога во играта „shag, marry, date“ ја избра австралиската пејачка Кајли Миног.