Американскиот претседател Доналд Трамп го повика Конгресот да усвои закон што треба појасно да ги утврди правилата за брзорастечкиот сектор на криптовалути, додека прашањата за неговите семејни инвестиции во оваа индустрија остануваат дел од политичката дебата.
Трамп, чие семејство според Ројтерс заработило повеќе од 1,4 милијарди долари од бизниси поврзани со криптовалути, побара од законодавците да усвојат „фер верзија на Законот CLARITY“.
Предлог-законот е еден од главните приоритети на криптоиндустријата, но неговото усвојување е заглавено во Сенатот, додека времето во актуелниот конгресен календар се намалува.
„Сега ни треба Конгресот да го направи следниот чекор и да го усвои Законот CLARITY – фер верзија на Законот CLARITY“, рече Трамп на настан во Белата куќа.
На настанот присуствуваа некои од највлијателните претставници на американската криптоиндустрија, меѓу кои извршниот директор на „Коинбејс“, Брајан Армстронг, извршниот директор на „Робинхуд“, Влад Тенев, коизвршниот директор на „Кракен“, Арџун Сети, како и извршниот директор на „Интерконтинентал ексчејнџ“, Џефри Спречер.
Присутни биле и претседателот на Комисијата за тргување со стоковни фјучерси, Мајк Селиг, претседателот на Комисијата за хартии од вредност, Пол Аткинс, како и советникот на Белата куќа за криптовалути, Патрик Вит.
Што треба да промени законот?
Законот CLARITY треба да воспостави појасна граница меѓу криптотокените што се третираат како хартии од вредност и оние што се сметаат за стоки, како и да утврди која американска регулаторна институција е надлежна за одделните делови од секторот.
Криптокомпаниите со години бараат ваква регулаторна рамка, тврдејќи дека сегашната правна неизвесност го отежнува работењето и инвестициите.
Трамп води политика наклонета кон криптоиндустријата откако се врати во Белата куќа во јануари 2025 година. Сепак, сеопфатната законска рамка што ја бара секторот сè уште не е усвоена.
Американската Комисија за хартии од вредност во вторникот предложи долгоочекувани правила со кои одредени понуди на токени би биле изземени од дел од прописите за хартии од вредност. Тоа би можело да им го олесни издавањето токени и прибирањето капитал на криптокомпаниите.
Спорот околу криптобизнисите на Трамп
Една од најголемите политички пречки за законот се финансиските интереси на семејството Трамп во криптоиндустријата.
Голем број демократи, но и дел од републиканците, велат дека нема да поддржат закон без строги одредби со кои на политичките функционери, вклучително и на претседателот, би им било забрането да профитираат од сопствени криптопроекти додека се на функција.
Меѓу бизнисите поврзани со семејството на Трамп се „Ворлд либерти фајненшл“ и мем-криптовалутата „Трамп“.
Анкета на Ројтерс/Ипсос објавена оваа недела покажала дека мнозинството Американци сметаат дека Трамп и неговото семејство несоодветно профитирале од криптосекторот по неговото враќање на власт и дека неговите политички одлуки се под влијание на приватните деловни интереси.
Трамп тврди дека нема секојдневна улога во семејните бизниси и дека неговите инвестиции се управувани независно. Белата куќа ги отфрла обвинувањата за несоодветно постапување.
Исходот од расправата околу CLARITY затоа може да биде важен не само за иднината на американскиот криптопазар, туку и за пошироката дебата во Вашингтон за судирот меѓу јавната функција и приватните финансиски интереси.