Луксузниот крузер „Villa Vie Odyssey“, кој повеќе од две години патува околу светот, ги прекина операциите поради нагло зголемените трошоци за гориво, оставајќи околу 200 патници привремено заглавени во Камбоџа.
Американската компанија „Villa Vie Residences“, оператор на бродот, соопшти дека работи со патниците на планови за симнување од бродот и обезбедување привремено сместување.
Бродот, долг речиси 200 метри и со капацитет до 650 патници, тргна од Белфаст во октомври 2024 година на повеќегодишно патување околу светот.
Компанијата наведува дека глобалниот раст на цените на горивото, поврзан со војната во Иран, драстично ги зголемил оперативните трошоци.
Во делови од Азија, месечниот трошок за гориво по кабина пораснал од околу 1.800 на дури 8.000 долари.
Побавно пловење не било доволно
Операторот претходно се обидел да ја намали потрошувачката со побавно пловење и подолги престои во пристаништата.
Но, според компанијата, ниту тие мерки не биле доволни за да се покрие драматичното поскапување.
„Пренесувањето на целото зголемување на трошоците врз жителите не е реално решение“, соопшти компанијата.
Во следните 60 дена ќе се спроведува финансиско преструктурирање и докапитализација, но компанијата предупреди дека нема гаранција дека процесот ќе биде успешен.
Патниците сместени во хотели
Според извештаите, околу 200 патници биле на бродот кога им било наредено да се симнат во пристанишниот град Сихануквил во Камбоџа.
Патничката Холи Хенеси за Би-Би-Си изјавила дека патниците се распределени во различни хотели и сега чекаат информации дали патувањето ќе продолжи.
„Не беше на мојата бинго-листа на места каде што би поминала многу време“, рече таа.
Сепак, Хенеси вели дека засега нема намера да се откаже од патувањето.
„Додека не кажат дека е навистина крај, јас не се откажувам“, рече таа.
Крстарење планирано за три и пол години
Патувањето на „Villa Vie Odyssey“ било планирано да трае околу три и пол години и да опфати речиси 150 земји.
Бродот нуди постојано живеење на море, со кабини што се продаваат по цени од 120.000 до 440.000 долари.
Кабините може и да се изнајмуваат по цена од околу 3.500 долари месечно.
Компанијата минатата година воведе и програма за доживотно живеење на бродот, наменета за луѓе што сакаат пензионерските години да ги поминат на море.
Патувањето и претходно имаше проблеми. По поаѓањето во 2024 година, бродот доцнеше со месеци поради поправки, оставајќи ги патниците привремено во Белфаст и создавајќи милионски трошоци за операторот.
До моментот на прекинот, крузерот бил повеќе од 750 дена на своето патување околу светот.