Франција и Шведска ги продлабочуваат одбранбените врски во северна Европа преку заеднички воздушни мисии, производство на ракети и разговори за нуклеарно одвраќање, во обид да се засили европската безбедност поради загриженоста околу посветеноста на САД под Доналд Трамп, пишува Politico.
Како дел од мисијата „Pégase High North“, Француските воздухопловни сили во април распоредија танкер-авион A330 MRTT на најсеверната шведска база во Лулео. Ова е трет ваков ангажман годинава и дел од заедничките напори на Париз и Стокхолм да изградат способност за брзо дејствување во арктичкиот регион – област од стратешко значење по приклучувањето на Шведска и Финска во НАТО.
„Покажуваме дека можеме да дејствуваме низ Европа за половина ден“, изјавил генерал Патрис Игрe, раководител на француската мисија, пренесува Politico.
И покрај географските разлики – Шведска дели поморска граница со Русија, додека Франција е на јужното крило на НАТО – двете земји се потпираат на силна домашна воена индустрија и политика на самодоволност во одбраната. Командантот на шведските воздухопловни сили, генерал-мајор Јонас Викман, изјавил дека оваа стратегија била нужност пред членството во НАТО: „Не можевме да се потпреме на никој друг“.
Покрај блиската соработка, Франција и Шведска остануваат конкуренти на глобалниот пазар на оружје – особено кога станува збор за борбените авиони на Dassault и Saab. Сепак, Politico посочува дека двете држави се дел од европската иницијатива за развој на проектили со долг дострел, а во игра е и можно француско купување на шведскиот надзорен авион GlobalEye.
Една од најчувствителните точки на соработка е предлогот на францускиот претседател Емануел Макрон за европско нуклеарно одвраќање. Според Politico, Шведска е една од ретките европски земји што се отворени за разговори за улогата на француското нуклеарно оружје во заштитата на континентот, особено во светло на можниот американски изолационизам под Трамп.
„Прашањето за нуклеарното одвраќање сè повеќе се наметнува во позадина“, изјавил Јакоб Халгрен, директор на Шведскиот институт за меѓународни односи, додавајќи дека внимателно ја следат американската политика.
Мисијата „Pégase“ опфаќа и тестирање на НАТО планови за регионална одбрана, вклучувајќи обука за брзо распоредување, дополнување гориво во воздух и користење на локална логистика во Лулео. Војниците вежбаат и техники како слетување на патишта – способност што Шведска ја развила поради близината со Русија, а што би можела да биде корисна и за други сојузници на НАТО, пишува Politico.