Градоначалничката на Скопје, Данела Арсовска, обвини дека институциите на државата не само што не покренале истрага за случајот со нелегална легализација во Општина Чаир, туку активно учествувале и во обидите за прикривање на криминалот.
Според Арсовска, Општина Чаир во вторникот, во 14:44 часот, поднела Решение до Агенцијата за катастар на недвижности за поништување на претходното решение за легализација, за кое таа вели дека било донесено врз основа на фалсификувани документи. Решението, според неа, е антидатирано на 2 мај 2025 година, со цел да се создаде впечаток дека институциите реагирале пред јавноста да биде информирана за случајот.
„Не може да се прикрие фактот дека документот е доставен неколку часа по нашите пријави до МВР,“ напиша Арсовска на социјалните мрежи.
Таа ги обвини Владата и министерот за внатрешни работи дека, наместо да постапуваат, активно учествуваат во прикривање на доказите, дозволувајќи, како што рече, функционерите Висар Ганиу и Изет Меџити „да ги уништуваат доказите“.
„До сега требаше да бидете во општината и да ги обезбедите сите докази, наместо да им дозволувате да ги прикриваат своите дела,“ порача Арсовска, упатувајќи повик до Јавното обвинителство да преземе итна акција.
Таа ги повика и меѓународните претставништва – вклучувајќи ги Амбасадата на САД, Делегацијата на ЕУ, како и британската и германската амбасада во Скопје – да го следат случајот.