Демократската унија за интеграција (ДУИ) изрази длабока загриженост поради последните случувања во Министерството за внатрешни работи и Армијата, оценувајќи дека евидентен е континуиран и систематски процес на деградација и исклучување на Албанците од раководни државни функции.
Во соопштението, ДУИ посочува дека последниот случај на смена на сите албански заменик-шефови и именување на блиски лица до градоначалникот на Општина Бутел во локалната полициска станица претставува „институционален скандал“ и „опасен сигнал за враќање на ексклузивитетот и дискриминацијата“ во секторот за безбедност.
Особено е алармантно, се наведува, што ова се случува во Бутел – мултиетничка општина во главниот град каде Албанците претставуваат значителен дел од населението.
„Едноетничките и партиски мотивирани именувања, како и понижувачката деградација на професионалниот албански кадар во полицијата, го нарушуваат принципот на инклузивност – темелен столб на Охридскиот рамковен договор“, наведува партијата.
ДУИ потсетува дека токму правичната застапеност на Албанците во полицијата и армијата беше предуслов за стабилизирање на меѓуетничките односи по конфликтот во 2001 година.
„Денес сведочиме на обратен процес – демонтажа на механизмите на рамнотежа, што води кон враќање на недовербата и чувството на исклученост кај цел еден народ“, се вели во реакцијата.
Партијата апелира до Владата, Министерството за внатрешни работи и меѓународната заедница, особено до гаранторите на Охридскиот договор, да реагираат итно и недвосмислено.
„Безбедносниот сектор не смее да стане инструмент на етничка доминација и политички реваншизам. Ова не е само прашање на внатрешни кадровски политики – ова е прашање на стабилноста, довербата и иднината на заедничката држава“, се наведува во соопштението.