Македонската православна црква располага со 101 квадратен километар имот, а ИВЗ со 13 квадратни километри. МПЦ-ОА поседува околу една третина од планината Галичица и големи делови од македонската страна на Јабланица, западно од патот од Струга кон Дебар, кон границата со Албанија. Најголемото земјиште на ИВЗ, пак, е на јужната падина на Водно со вкупна површина од два и пол милиони квадратни метри. Тоа се речиси 20 отсто од вкупниот имот на заедницата. Падината се наоѓа во близина на селото Чифлик и се протега речиси до сртот на врвот на Водно, покажува истражувањето на Призма.
Нивната нова база на податоци „Верски имоти под лупа“, обезбедува увид во имотот на двете најголеми верски заедници во Северна Македонија – Македонската православна црква – Охридска архиепископија (МПЦ-ОА) и Исламската верска заедница (ИВЗ), којшто е впишан во катастарот.
Базата покажува дека над 80% од имотите на МПЦ-ОА се шуми, ливади и пасишта, односно околу 8.100 хектари, а ИВЗ располага со 3.200 хектари шуми. МПЦ-ОА има и 1.300 хектари земјоделско земјиште, додека ИВЗ 1.700 хектари.
Во базата се внесени 14.757 парчиња имот со кои располага МПЦ-ОА, поединечните цркви или нејзините епархии, како и дополнителни 5.363 кои во катастарот се внесени како имоти во кои фигурира ИВЗ, нејзините муфтиства или локалните џамии.
Имот колку три општини
Според Призма, ако се собере вкупниот имот на МПЦ-ОА на едно место, би се создала територија малку поголема од скопските општини Карпош, Аеродром и Кисела Вода заедно.
Над 80 отсто од имотот на МПЦ-ОА се шуми, ливади и пасишта, околу 81 милион квадратни метри. Во оваа категорија спаѓаат и најголемите поединечни парчиња што ги поседува црквата, оние на планината Галичица, впишани во сопственост на манастирот „Свети Наум“. Големи шумски подрачја, таа има и на северната страна од Скопска Црна Гора, на Јабланица, како и кај манастирот „Свети Јован Бигорски“, каде што шумскиот посед се простира сѐ до пасиштата во горниот дел на Бистра. Помали шуми, пасишта и ливади има на околу три илјади локации низ земјата.
Со 13 милиони квадратни метри, земјоделскиот имот е втор по големина што го има МПЦ-ОА. Црквата поседува ниви што се простираат и до 20 хектари, односно 200 илјади квадратни метри. Освен ниви, таа има и лозја и овоштарници. Според катастарските податоци, црквата е сопственик и на два рибника.
Станови, дуќани, хотели
Станбениот простор во сопственост на МПЦ-ОА изнесува околу 140.000 м², а кај ИВЗ над 37.000 м², вклучувајќи и станбени простори во нови објекти во Скопје, Битола, Тетово и други градови. Црквата има деловни простори во чаршиите во Скопје, Битола, Охрид и Прилеп, додека ИВЗ стопанисува со пазарот во Дебар, трговски комплекс во Гостивар и објекти во Струга, Тетово и Битола.
Сопственик на хотелите „Изгрев“ и „Бисер“ на Охридско Езеро е МПЦ-ОА, додека ИВЗ има апартман во хотелот „Парк Лејксајд“ во Охрид.
Згради, пазари и 700 џамии
ИВЗ, пак, има дуќани и трговски простории во десетина општини во земјата, најчесто во чаршиите и во старите градски јадра. Тие се дел од вкупниот имот што го поседува заедницата, кој изнесува вкупно 13 милиони квадратни метри, или 13 квадратни километри, покажува базата врз основа на податоците на интернет-страницата на Агенцијата за катастар.
Станува збор за вкупно 5.363 поединечни парчиња имот што се впишани како имот на заедницата, на некое од нејзините 13 муфтиства или на локалните џамии. Во нив има верски објекти, гробишта, но и станови, деловни простории, шуми, пасишта, ниви, земјоделско земјиште, спортски објекти и градежно земјиште. Од нив, 209 имоти се во мешана сопственост на ИВЗ со државата, компании или граѓани, а на 5.154, сопственик е исклучиво Исламската заедница.
Како што наведува Призма, градскиот пазар во Дебар, заедно со објект што го користи синџир супермаркети, е најголемиот деловен објект на ИВЗ, од 2.339 квадратни метри. Таа поседува и комплекс од триесетина дуќани во Гостивар, со вкупна површина од 668 квадрати, а во нејзина сопственост е и безистенот во Скопската чаршија, од 545 квадрати. Дуќани има и во Тетово, Струга, како и во битолската чаршија. Вкупно 215 имоти има заедницата регистрирани како деловен простор. Така се впишани и делови од просториите покрај џамиите, од кои некои се користат за административните потреби на ИВЗ, а други за трговија или за други стопански дејности.
ИВЗ има и угостителско-туристички објекти – ресторан во Дебар и апартмани во хотелот „Лејксајд“ во Охрид. Меѓу имотот на ИВЗ може да се најдат над 37 илјади квадратни метри станбен простор. Според сопствените податоци на ИВЗ, заедницата има околу 700 џамии.