Заменик-претседателот на Владата, Арбен Фетаи, изјави во понеделникот дека не гледа причина за саботажа на актуелната влада, притоа обвинувајќи го лидерот на Алијансата за Албанците (АА), Арбен Таравари, дека следи агенда која има за цел враќање на Демократската унија за интеграција (ДУИ) во власта.
Во емисијата Click Plus на ТВ21, Фетаи рече дека владејачката коалиција ВЛЕН и АА имаат широка народна и меѓународна поддршка и оти Владата останува стабилна.
„Обидот за повлекување на АА од Владата е дел од сценарио за враќање на ДУИ. Тоа е погрешен правец што го следи г. Таравари,“ изјави Фетаи, додавајќи дека и покрај личното пријателство со Таравари, имаат различни политички ставови.
Фетаи истакна дека мнозинството функционери од АШ сѐ уште се активни во Владата. „АА има околу 50 функционери поставени на државни позиции, и само тројца од нив поднеле оставка. Сите останати продолжуваат да си ја вршат работата,“ рече тој.
Тој ја отфрли можноста за одржување на паралелни парламентарни и локални избори, нагласувајќи дека локалните избори ќе се одржат редовно и дека, според него, ќе бидат добиени од ВЛЕН и ВМРО-ДПМНЕ.
„Нема двојни избори. Оваа дилема вечерва завршува,“ изјави Фетаи.
Според него, Таравари немал статутарна основа за да го објави напуштањето на Владата. „Тоа не беше седница на партиското раководство, туку измислен формат што не постои во партискиот статут. Такви одлуки може да ги донесе само Собранието на партијата. Јас одбив да легитимирам таков процес,“ додаде тој.
Минатата недела, претседателот на АШ, Арбен Таравари, објави дека партијата ќе ја напушти Владата – одлука што предизвика видливи поделби во партијата.