Заменик-премиерот Арбен Фетаи и пратеникот Беким Ќоку, претставници на коалицијата ВЛЕН, остварија средба со раководството на косовската партија „Самоопределување“ во Приштина, на која се разговараше за претстојните локални избори во Северна Македонија и Косово.
На средбата присуствувале и претставници на Алијансата за Албанците – пратеничката Мимоза Муса, Башким Бакиу и Илка Нуредини. Делегацијата била пречекана од премиерот на Косово и лидер на „Самоопределување“, Албин Курти, и заменик-претседателот и пратеник Глаук Коњуфца.
„Разговаравме за подготовките за локалните избори што ќе се одржат во октомври и во Северна Македонија и во Косово, како и за унапредување на идната меѓупартиска соработка“, напиша Фетаи на социјалните мрежи.
Соговорниците се согласиле да воспостават редовна комуникација и координација со цел поттикнување на напредокот и одржливиот развој на двете земји.