Поранешната германска канцеларка Ангела Меркел рече дека и по речиси една деценија стои зад својата контроверзна изјава „Ќе успееме!“, дадена за време на бегалската криза во 2015 година, нагласувајќи дека човековото достоинство и натаму треба да биде основа на политиката за азил.
Во документарец на јавниот сервис АРД, Меркел оцени дека одлуката да им се дозволи влез на стотици илјади бегалци била „огромен предизвик“, но неопходна за да не се изневери моралниот принцип на Германија. „Мора да успеам човечки достоинствено. За мене пристапот кон темата беше поважен од сè друго,“ рече таа.
На 31 август 2015 година, Меркел ја изговори реченицата што ја обележа нејзината политика: „Ќе успееме!“. Отворањето на границите предизвика сериозни општествени и политички тензии, со над еден милион барања за азил во само две години, пренатрупани прифатилишта и зголемен притисок врз локалните заедници.
Меркел призна дека дел од германските граѓани поради тоа се свртеле кон десничарската „Алтернатива за Германија“ (АфД), која во меѓувреме стана клучна политичка сила. „Тоа сигурно ја направи АфД посилна,“ изјави таа. „Но дали тоа е причина да не се направи нешто што е правилно и достоинствено? Јас мислам дека не.“
Во рамките на нејзината партија, демохристијанската ЦДУ, поддршката за таквиот курс брзо опадна. Под водство на Фридрих Мерц, кој во 2022 ја презеде функцијата партиски лидер, ЦДУ/ЦСУ прогласи „пресврт во азилната политика“. На летната прес-конференција годинава, Мерц оцени дека Германија „евидентно не успеала“ во интеграцијата на мигрантите.
Меркел, пак, дава поинакво толкување: „Ова е процес. Досега постигнавме многу, но сè уште има работа која мора да се заврши,“ рече таа.
Во однос на Европа, Меркел призна дека не успеала да обезбеди заедничка стратегија во рамките на ЕУ. „Ова прашање можеме успешно да го решиме само ако размислуваме европски заедно, иако тоа е тешко,“ рече таа.
Анкетите покажуваат дека германската јавност е сè посклона кон рестриктивна политика – во истражувањето „Дојчландтренд“ од јануари 2025 година, 68% од испитаниците поддржале построги правила за бегалците.
И покрај критиките, Меркел останува доследна на својата изјава од пред една деценија: „Ќе успееме“.