Цената на златото благо се намали во средата поради зајакнувањето на американскиот долар, додека инвеститорите се воздржуваат од поголеми вложувања во исчекување на одлуката на претседателот Доналд Трамп за новите именувања во Управниот одбор на Федералните резерви (ФЕД).
Спот златото се тргуваше по цена пониска за 0,1%, на 3.376,69 долари за унца во 06:31 GMT, откако во вторникот достигна највисоко ниво во последните две недели. Американските фјучерси за злато исто така паднаа за 0,1%, на 3.432,40 долари.
Индексот на доларот (.DXY) се опорави од еднонеделниот минимум, откако слабите податоци за американскиот пазар на труд ги засилија очекувањата за намалување на каматните стапки во септември, што ја намалува привлечноста на златото за инвеститорите што тргуваат со други валути.
„Златото е заглавено меѓу спротивставени сили. Падот на приносите помага, но доларот остана силен и покрај петочната распродажба. Тоа ја создава моменталната консолидирана зона на тргување, додека пазарот чека јасни сигнали,“ рече Иља Спивак, директор за глобална макроанализа во Tastylive.
Трамп во вторникот најави дека наскоро ќе го објави името на привремената замена за гувернерката на ФЕД, Адријана Куглер, која поднесе оставка во петокот, како и својот кандидат за иден претседател на ФЕД.
Според алатката FedWatch на CME, шансите за намалување на каматните стапки во септември се зголемени на речиси 88%, по објавата на пониските од очекуваните податоци за вработеност во САД. Трамп по ова ја отпушти директорката на Бирото за трудова статистика.
На трговски план, Трамп повторно се закани со зголемување на царините за индиски производи поради набавките на руска нафта, додека Њу Делхи ги нарече критиките „неоправдани“ и вети дека ќе ги заштити своите економски интереси, продлабочувајќи го трговскиот спор меѓу двете земји.
Во меѓувреме, продажбата на златни производи од страна на рафинеријата Perth Mint во јули опадна за 33% во споредба со претходниот месец, додека продажбата на сребро достигна најниско ниво во последните шест месеци, соопшти компанијата во средата.
Спот среброто остана стабилно на 37,85 долари за унца, платината падна за 0,1% на 1.319,35 долари, додека паладиумот се намали за 0,6% на 1.168,17 долари.