Седницата на собраниската Комисија за надзор над работата на Агенцијата за разузнавање (АР) и Агенцијата за национална безбедност (АНБ), закажана за петок, е поништена, а не одложена, изјави претседателот на комисијата, Скендер Реџепи од колаицијата „АКИ“.
Тој обвини дека претседателот на Собранието, Африм Гаши, се обидел да свика седница без да достави претходно барање, што е спротивно на Деловникот. „Денеска за малку ќе бевме сведоци на нов скандал, бидејќи претседателот на парламентот сакал да свика седница без законска основа“, рече Реџепи.
Според член 126 од Деловникот, седница може да свика претседателот на работното тело, по барање на претседателот на Собранието или најмалку една третина од членовите. Реџепи рече дека до него не пристигнало никакво такво барање и дека седницата затоа е поништена.
Тој најави дека ќе поднесе кривична пријава доколку претседателот на парламентот продолжи со постапки спротивни на процедурите. Од кабинетот на Гаши засега нема коментар.
Седницата требаше да се одржи поради обвинувања за незаконско прислушкување од страна на АНБ во периодот 2019–2024 година, а со неа требаше да претседава пратеничката на СДСМ, Славјанка Петровска.
Реџепи додаде дека тој и неговиот заменик сè уште немаат безбедносни сертификати, иако, како што рече, чекале повеќе од десет месеци.