Претседателот на Европскиот совет, Антонио Кошта, во петокот изјави дека Северна Македонија заслужува гаранции оти нема да се соочи со нови услови на патот кон Европската унија откако ќе ги исполни сегашните обврски.
„Многу е важно да се изгради доверба и да ѝ се даде гаранција на Северна Македонија дека она што го бараме сега е сè што бараме, а не дека чекаме потоа да побараме повеќе. Тоа е разумно“, рече Кошта на прес-конференција со бугарскиот премиер Росен Желјазков во Софија.
Тој нагласи дека токму заради потребата од доверба ги поканил владите во Скопје и Софија да започнат соработка на конкретни проекти, меѓу кои и подобрување на транспортните коридори.
„Ова би бил прв важен чекор за да се почне да се работи заедно“, додаде тој.
Кошта истакна дека земјата мора да ги исполни постојните обврски – пред сè уставните измени – за да ги отпочне преговорите со ЕУ. „Она што е договорено, е договорено. Тие треба да испорачаат“, рече тој.
Притоа потсети дека ја разбира фрустрацијата во Скопје, кое веќе го сменило знамето, името и еднаш го менувало Уставот. „Природно е да очекуваат конкретизација на процесот“, рече Кошта.