Пратеничката на СДСМ, Славјанка Петровска, во петокот ја обвини власта за несериозен пристап кон надзорот на Агенцијата за национална безбедност (АНБ) и Агенцијата за разузнавање, откако седницата на собраниската комисија беше одложена поради, како што рече, процедурни пропусти.
„Подготвена сум да претседавам кога и да се закаже седницата, но очигледно власта сака вниманието да го насочи кон деловнички интерпретации, наместо кон суштината – надзорот што не го посакуваат“, изјави Петровска на прес-конференција.
Таа рече дека СДСМ инсистира на итна декласификација на документите поврзани со случајот, за кои тврди дека можат да откријат „интересни сознанија“. Според неа, одложувањето може да е резултат на страв од тоа што ќе биде обелоденето.
Петровска посочи дека постои можност за привремен безбедносен сертификат за претседателот на комисијата, што би овозможило седницата да се одржи веднаш. Таа додаде дека е подготвена да се потпише на иницијатива за свикување на комисијата, и обвини дека манипулациите може да бидат подготовка за спојување на двете агенции со директор без искуство во безбедносниот сектор.