Северна Македонија ќе спроведе експертско вештачење за да се утврди точниот степен на загадување на животната средина од големиот пожар што избувна во саботата попладне во магацин за рециклирање отпад во селото Трубарево, на периферијата на Скопје, изјави министерот за животна средина и прв вицепремиер, Изет Меџити.
Пожарот во објектот на компанијата „Ф Групација“, кој траеше повеќе од 15 часа, е целосно изгаснат, а пожарникарите спречија негово ширење во околните хали каде имало складирана пластика и други отпадни материјали. Густ црн чад прекри делови од Скопје и предизвика вознемиреност кај населението.
„За целосна транспарентност, веднаш ангажиравме акредитирани лаборатории за мерење на квалитетот на воздухот. Ќе се земат мостри и од почвата, а ќе биде направено и вештачење за да се утврди точноста во колкава мера било загадувањето,“ рече Меџити на прес-конференција во Владата.
Тој посочи дека компанијата поседува важечка дозвола за управување со отпад издадена од Министерството во 2021 година, која важи до 2031. Според него, државниот инспекторат за животна средина веднаш излегол на терен, а мерења спровеле и лабораторијата „Еуромак Контрол“, како и специјалната единица на Армијата за радиобилошко и хемиско загадување.
Меџити потсети дека ова е трет голем пожар на објекти со отпад за краток период, по оние во Вардариште и на депонијата Дрисла. „Ова е аларм кој бара сериозна институционална мобилизација. Очекуваме инцидентот целосно да се расчисти и јавноста да ги дознае одговорните,“ изјави тој.
На прашање на новинарите дали е познато какви материи се испуштале во воздухот и што вдишувале граѓаните, министерот рече дека првичните резултати се очекуваат уште во текот на денот. „Ќе информираме детално и транспарентно,“ додаде тој.
Серијата пожари во објекти со отпад предизвика реакции и кај невладините организации, кои предупредуваат дека повторливите инциденти укажуваат на слабости во системот за управување со отпадот и бараат построга контрола и санкции.
Владината портпаролка Марија Митева информира дека четири лица биле згрижени на Клиниката за токсикологија – две хоспитализирани и две со амбулантски третман – поради вдишување на чад. Министерот за здравство Азир Алиу и директорот на Клиниката, д-р Арѓенд Имери, треба да соопштат дополнителни детали за нивната состојба.
Стојанче Ангелов, директор на Дирекцијата за заштита и спасување, рече дека пожарникарите откривале каде горат литиумските батерии според пукотниците и таму дејствувале со песок, додека другите материјали биле гаснати со вода и пена.