Лидерот на Демократската унија за интеграција (ДУИ) и на коалицијата Алијанса за национална интеграција (АКИ), Али Ахмети, во своето прво појавување по локалните избори на 19 октомври, со видлива тензија изјави дека земјата треба без одложување да оди на предвремени парламентарни избори.
„Секој ден слушаме дека некој друг победил. Не само овие избори, туку и тие што ги оставивме зад нас се големи губитници. Нашата ориентација е јасна — државата треба да оди на предвремени избори и тоа без многу одлагање,“ изјави Ахмети по седницата на партиското раководство.
Ахмети тврдеше дека коалицијата АКИ е победник на изборите, со најголем број гласови и советници низ општините. „АКИ има освоено 114.760 гласа и 159 советници. Таканареченото друштво од Газиместан, ВЛЕН, има 91.849 гласа и 122 советници. Јасно е кој е победник,“ рече Ахмети, додавајќи дека противниците „секојдневно се обидуваат да ја извртуваат вистината“.
Со видливо вознемирен тон, Ахмети остро реагираше на новинарско прашање дали размислува за повлекување од политиката.
„Зошто јас да се повлечам? Дали слушате? Кој победи, а кој изгуби? Губитникот треба да се повлече. Одете во Државната изборна комисија и проверете,“ изјави тој.
Неговиот заменик, Арбер Адеми, ги отфрли шпекулациите дека Ахмети планира заминување од политиката, оценувајќи ги како дезинформации насочени кон демотивирање на гласачите пред вториот изборен круг на 2 ноември.
„Повлекување на Али Ахмети воопшто не е тема. Напротив, ДУИ е победничка партија – добивме 23.000 гласови повеќе од ВЛЕН и го зголемивме бројот на советници на 120,“ рече Адеми.
Според него, денешната седница на раководството ќе биде посветена на анализа на резултатите и политичката состојба, а не на лидерската позиција на Ахмети.