Руската нафтена компанија „Лукоил“ ги распродава своите европски средства во итен рок, пред да стапат во сила новите санкции на САД насочени кон руската енергетска индустрија, јави The Guardian.
Според весникот, продажбата на дел од средствата во Бугарија, Романија и други држави од регионот е дел од обидот на компанијата да избегне блокирање на имот и финансиски трансакции поради санкциите што Вашингтон треба да ги воведе наредните денови.
„Лукоил“, кој е една од последните руски компании што сè уште одржува значајно присуство во Европската унија, ги забрзува преговорите со приватни купувачи, меѓу кои има и западни енергетски групации.
Американските власти најавија дека новиот пакет санкции ќе вклучи целосна забрана за трговија и инвестиции во сите руски нафтени компании кои остваруваат значајни приходи од извозот на сурова нафта и деривати.
Извори блиски до компанијата изјавија дека „Лукоил“ настојува да ја финализира продажбата на своите рафинерии и дистрибутивни мрежи до крајот на неделата, со цел да спречи блокада на сметки и испораки на нафта.
Експертите предупредуваат дека итната продажба може да резултира со големи загуби за руската компанија, но и со потенцијални нарушувања на пазарот во Југоисточна Европа, каде што „Лукоил“ е еден од најголемите добавувачи на горива,
Рускиот министер за енергетика изјави дека „Москва ќе најде начини да ги заштити своите стратешки компании од незаконски западни притисоци“.
САД и ЕУ ги прошируваат санкциите против Русија поради војната во Украина, која влезе во третата година без знаци на дипломатски пробив.