Алијансата за Албанците (АзА) на Зиадин Села во вторникот соопшти дека официјално се повлекува од коалицијата НАИ, оформена за локалните избори, по едногласната одлука на партиското раководство.
Во соопштението од партијата се наведува дека АзА ќе делува самостојно, а нејзините пратеници во наредните денови ќе го формализираат создавањето на независна пратеничка група во Собранието.
Партијата порача дека ќе остане „силен опозициски глас на Албанците“ и најави широка серија средби со членството, граѓаните и политичките и општествените актери за зајакнување на сопствените редови во, како што ја опиша, „осетлива политичка фаза“.
АзА повтори дека, и покрај тоа што листата со која настапи во коалицијата НАИ освои најмногу советнички мандати на национално ниво, партијата е незадоволна од резултатите во трката за градоначалници. Таа ги обвини албанските партии на власт и нивните македонски партнери за „силен државен инженеринг“ со цел, како што рече, спроведување на платформата на ВМРО-ДПМНЕ за „дефакторизација на Албанците“.
Националната кауза, еднаквоста на Албанците во државата и Уставот, како и, според партијата, „адресирањето на штетите направени од актуелната влада“, остануваат врвни приоритети.
Сè уште не е јасно каква ќе биде иднината на коалицијата НАИ по заминувањето на едното крило на Алијансата за Албанците.