Американскиот претседател Доналд Трамп и кинескиот лидер Си Џинпинг одржаа речиси двочасовни разговори во Пекинг, во обид да ги стабилизираат односите меѓу двете најголеми светски економии, додека трговијата, Тајван, технологијата и војната во Иран остануваат главни точки на несогласување.
Си, кој го пречека Трамп со свечена церемонија во Големата сала на народот, порача дека Кина и САД треба да бидат „партнери, а не ривали“.
„Целиот свет гледа“, рече Си на почетокот на средбата.
Трамп, пак, го нарече Си „голем лидер“ и изјави дека односите меѓу двете земји можат да бидат „подобри од кога било“.
По состанокот, Трамп кратко ги оцени разговорите како „одлични“.
Кинеските државни медиуми објавија дека Си предупредил на можен „конфликт“ со САД доколку прашањето за Тајван не се третира внимателно.
„Ако ова прашање се решава добро, билатералните односи можат да останат генерално стабилни. Ако не се постапи правилно, двете земји може да се судрат или дури да влезат во конфликт“, изјавил Си, според кинеските медиуми.
Тајван е самоуправуван остров што Кина го смета за своја територија, додека САД одржуваат неформални, но силни врски со Тајпеј и обезбедуваат оружје за негова одбрана.
По разговорите, Трамп и Си го посетија Храмот на небото во Пекинг, историски комплекс од времето на династијата Минг. Трамп е втор актуелен американски претседател што го посетил ова место, по Џералд Форд во 1975 година.
На средбата во Пекинг присуствуваа и високи американски бизнис-лидери, меѓу кои Илон Маск, извршниот директор на „Apple“ Тим Кук и шефот на „Nvidia“ Џенсен Хуанг.
Си порача дека кинеската врата ќе биде „уште пошироко отворена“ за американските компании и дека двете страни треба да ја одржат „позитивната динамика“ во економските односи.
Трамп, пред пристигнувањето во Кина, изјави дека ќе побара Пекинг да се „отвори“ за американската индустрија.
Средбата доаѓа во период на високи тензии меѓу Вашингтон и Пекинг околу царините, ретките метали, полупроводниците, вештачката интелигенција и геополитичките кризи.