Германскиот канцелар Фридрих Мерц во своето прво новогодишно телевизиско обраќање изјави дека 2026 година може да биде „година на нови почетоци“ за Германија, предупредувајќи на војната во Украина, економските притисоци и променливите односи со САД, но нагласувајќи дека земјата има капацитет сама да ги надмине предизвиците.
Мерц се наврати на предвремените избори од 23 февруари, на кои конзервативците ја презедоа власта од социјалдемократската влада предводена од Олаф Шолц.
„Граѓаните тој ден одлучија за политичката иднина на нашата земја. Формирана беше нова сојузна влада која со решителност и јасна насока има цел да ја насочи Германија на вистинскиот пат“, рече Мерц во извадоци од говорот.
Тој, сепак, призна дека задачата е „сè освен лесна“, оценувајќи дека 2025 година донела сериозни предизвици за Германија и светот.
„Во Европа беснее страшна војна која претставува директна закана за нашата слобода и безбедност. Нашата економија е под притисок од неопходни реформи, високи трошоци и глобални трговски конфликти“, рече канцеларот, додавајќи дека новите технологии темелно го менуваат пазарот на трудот и општеството.
Мерц изјави дека војната на Русија против Украина не е далечен конфликт без последици за Германија.
„Сè појасно гледаме дека руската агресија беше и е дел од план насочен против цела Европа“, рече тој, наведувајќи дека Германија се соочува со саботажи, шпионажа и сајбер-напади.
Тој најави зголемување на трошоците за одбрана, воведување доброволна воена служба за дел од младите, како и уставни измени што би овозможиле поголемо задолжување за финансирање на војската.
Мерц се осврна и на односите со САД, оценувајќи дека тие се менуваат по враќањето на Доналд Трамп во Белата куќа.
„Нашето партнерство со Соединетите Американски Држави, кои долго време беа сигурен гарант за нашата безбедност, се менува“, рече тој, додавајќи дека Европа мора посамостојно да ги брани своите интереси.
На економски план, канцеларот предупреди на враќање на протекционизмот во глобалната економија и на зголемената зависност од суровини, што, според него, се користи како политичка алатка против германските интереси. Тој најави олеснувања во даноците, енергетските цени и намалување на бирократијата, но призна дека заостанатите реформи ја кочат конкурентноста на германските компании.
Мерц се осврна и на стареењето на населението и пензискиот систем, нагласувајќи дека ќе биде потребно „новa рамнотежа“ во социјалната заштита, како и на миграцијата, истакнувајќи дека хуманоста и редот „се две страни на истата монета“.
Признавајќи го незадоволството на јавноста од бавниот напредок на реформите, Мерц рече дека резултатите „сè уште не се доволни“, но изрази уверување дека започнатите промени ќе донесат придобивки со текот на времето.
„Ние не сме жртви на околностите и не сме беспомошни пред големите сили. Нашите раце не се врзани“, заклучи германскиот канцелар.