Европската унија во саботата повика на почитување на територијалната целовитост на Сомалија, откако Израел стана првата држава што официјално го призна Сомалиленд, отцепениот регион на северот на земјата, како независна држава, јави Дојче Веле.
Потегот на Израел, објавен еден ден претходно, наиде на остра меѓународна осуда, при што бројни африкански и блискоисточни земји предупредија дека границите на Сомалија не можат еднострано да се менуваат.
Портпаролот на ЕУ за надворешни работи, Ануар ел Ануни, изјави дека Унијата „ја потврдува важноста од почитување на единството, суверенитетот и територијалниот интегритет на Федерална Република Сомалија“.
„Ова е клучно за мирот и стабилноста на целиот регион на Рогот на Африка“, се наведува во соопштението, во кое ЕУ исто така ги повика властите во Сомалиленд и федералната влада во Могадишу на „суштински дијалог“ за решавање на долгогодишните спорови.
Сомалиската влада остро реагираше на одлуката на Израел, оценувајќи ја како директен напад врз нејзиниот суверенитет. Официјални лица во Могадишу најавија дипломатски и правни чекори за спротивставување на, како што ја нарекоа, „незаконската и намерна“ легитимизација на сецесијата.
Претседателот Хасан Шеик Мохамуд го обвини Израел за кршење на меѓународните норми, истакнувајќи дека Сомалиленд останува составен дел од Сомалија.
Одлуката на Израел беше брзо отфрлена и од други влади и регионални организации. Египет, Турција, Џибути и земјите членки на Советот за соработка на Заливот ја осудија одлуката, предупредувајќи дека таа може да ја дестабилизира пошироката област на Рогот на Африка и коридорот на Црвеното Море.
Африканската унија и регионалниот блок ИГАД повторија дека меѓународно признатите граници на Сомалија не смеат да се менуваат еднострано. Нигерија и неколку блискоисточни држави, исто така, повикаа земјите да се воздржат од признавање отцепени региони.
Во заедничка декларација, повеќе од 20 држави и Организацијата за исламска соработка предупредија на „сериозни последици“ по регионалната и глобалната безбедност.
Соединетите Држави соопштија дека продолжуваат да го признаваат суверенитетот и територијалната целовитост на Сомалија, вклучително и територијата на Сомалиленд.
Израел, пак, го оправда потегот како дел од проширувањето на партнерствата инспирирани од Аврамовите договори, кои од 2020 година отворија дипломатски и економски канали меѓу Израел и неколку арапски и муслимански земји.
Сомалиленд, кој функционира како де факто држава од 1991 година со сопствени институции, валута и безбедносни сили, изрази надеж дека признавањето од Израел ќе ја прекине долгогодишната дипломатска изолација и ќе поттикне и други држави да го следат истиот пример.