Лидерот на СДСМ Венко Филипче ја обвини Владата дека не ги исполнила обврските од реформската агенда поврзана со европската интеграција, оценувајќи дека рокот што премиерот Христијан Мицкоски го поставил за реализација на реформите истекол без значителен напредок.
На прес-конференција, Филипче изјави дека од 10 закони за кои Европската Унија одобрила продолжување на рокот до јуни 2026 година, донесени биле само два.
„Од 10-те закони за кои рокот беше продолжен, реализирани се само два – измените на Царинскиот закон и Законот за безбедност на мрежни и информациски системи“, рече Филипче.
Тој тврди дека меѓу клучните закони што сè уште не се усвоени во согласност со европските барања се Законот за Судски совет, Законот за електронски комуникации, мерките за интеграција на пазарот на електрична енергија, како и воспоставувањето регистар на државни претпријатија и пополнувањето на капацитетите во Агенцијата за управување со одземен имот.
Филипче оцени дека Владата се обидува да ги прикаже како исполнети дел од обврските иако, според него, тие не се усогласени со препораките на Европската комисија и другите европски тела.
„Вкупната реализација е катастрофална. Очигледно е дека станува збор за намерно неспроведување на реформската агенда“, рече тој.
Лидерот на СДСМ додаде дека реформите во правосудството и владеењето на правото се меѓу најзначајните области во кои, според него, нема суштински напредок.
Тој ја обвини Владата дека нема вистинска намера да го забрза европскиот интегративен процес и повторно повика на усвојување на уставните измени како предуслов за продолжување на пристапните преговори со Европската унија.
„Се знае кој е патот напред. Тоа се уставните измени. Ако ја пропуштиме оваа можност, следната можеби нема да дојде за генерациите што следуваат“, изјави Филипче.
Владата досега не реагираше на обвинувањата изнесени од опозицискиот лидер.