Советот на јавни обвинители ја одложи за понеделник во 11 часот седницата на која требаше да назначи вршител на должноста државен јавен обвинител, по неотповикливата оставка на Љупчо Коцевски, изјавија извори од Советот.
Седницата, закажана за денеска, е одложена поради отсуство на еден од членовите на Советот, поради што не бил обезбеден потребниот кворум за одлучување, наведуваат истите извори.
Коцевски во вторникот поднесе неотповиклива оставка од функцијата државен јавен обвинител, која Собранието ја констатираше истиот ден, со што формално започна постапката за избор на негов наследник.
До изборот на нов државен јавен обвинител, Советот треба да определи вршител на должност кој ќе ја извршува функцијата привремено, согласно законската процедура.