Македонското обвинителство за гонење организиран криминал и корупција (ОЈО ГОКК) соопшти дека при повторен претрес во домот на родителите на апелацискиот судија Ѓоко Ристов во Неготино пронашло околу 350.000 евра сокриени во ѕид, во рамки на истрага за висока корупција и перење пари.
Парите биле откриени при втор обид, откако првичните претреси на три локации не дале резултати, изјави обвинителката Искра Хаџи Василева, која ја води истрагата.
„При вториот претрес забележавме сомнителни градежни интервенции – цемент кој беше посвеж од останатиот дел од ѕидот, иако ни беше кажано дека немало неодамнешни работи во објектот“, рече Хаџи Василева на брифинг со новинарите.
Според обвинителството, парите биле сокриени во кујнски ѕид, зад керамички плочки, во алуминиумски цилиндрични пакувања. Министерството за внатрешни работи соопшти дека биле пронајдени 610 банкноти од 500 евра и 225 банкноти од 200 евра.
Судијата Ристов е осомничен за „противправно стекнување и прикривање имот“ и за „перење пари“ и од вторникот се наоѓа во куќен притвор. Обвинителството наведува дека не постои веродостојно објаснување за потеклото на средствата и дека тие значително ги надминуваат неговите законски приходи.
Одбраната, пак, тврди дека парите им припаѓаат на родителите на судијата и дека биле заработени од земјоделска дејност, главно лозарство, што обвинителството го оспорува.
Според МВР, Ристов од неговиот избор за апелациски судија во 2020 година до денес давал неточни податоци за својот и за имотот на неговото семејство, кој, како што се наведува, „во голема мера ги надминува законските приходи“.
Обвинителството посочи дека истрагата започнала по пријави за корупција во Апелацискиот суд во Скопје и дека доказите биле собирани постепено, „како мозаик“.
Контурите на случајот се заостриле по апсењето на адвокатот Фехми Стафа, поранешен државен правобранител, кој е осомничен дека примил 50.000 евра за да посредува и да влијае врз одлука на апелациски судија. Стафа, според обвинителството, побарал вкупно 100.000 евра, а половина од сумата била исплатена пред неговото апсење.
Лицето од кое биле побарани парите е Љупчо Пецов – Ѓаволот, осомничен во предметот „Синџир“, кој опфаќа над 30 физички и правни лица и даночно затајување од околу 8 милиони евра. Пецов во моментов се наоѓа во куќен притвор.
Обвинителството наведува дека не може со сигурност да утврди од кои конкретни предмети потекнуваат пронајдените 350.000 евра.
„Кај поткупот директните докази се исклучително тешки, бидејќи најчесто постојат посредници и повеќеслојни механизми за заштита“, рече Хаџи Василева.
Здружението на судии соопшти дека се оградува од секој корумпиран судија и побара темелна и транспарентна истрага, со почитување на презумпцијата на невиност и угледот на чесните судии.