Судењето за случајот „Онкологија“ продолжи со клучни сведоштва на медицински експерти од Словенија, кои изнесоа сериозни забелешки за лекувањето на пациентите на македонската државна клиника за онкологија.
Вештакот Маја Равник од Медицинскиот факултет во Марибор изјави дека неколку пациенти добиле лекови без соодветна индикација, што, според нејзината анализа, довело до прогресија на болеста. Таа посочи дека пациентка со рак на јајници примала „цетуксимаб“ и „капецетабин“ без медицинска потреба, и дека промените во терапијата често не биле соодветно бележени.
„Од разгледаната документација, во многу случаи пациентите добивале лекови без запишана анамнеза или клинички преглед, а нема записи за потешкотии или следење на состојбата“, сведочеше Равник. Таа додаде дека од 51 разгледано медицинско досие, само едно имало конзилијарно мислење за терапијата.
Словенечките експерти истакнаа дека целокупната документација била хаотична и недоволна, а терапиите се давале без протоколи, што ја отежнувало оценката на третманот и безбедноста на пациентите.
Адвокатот на обвинетиот поранешен директор на клиниката, Никола Васев, оцени дека извештаите на словенечките вештаци се преригидни, додавајќи дека практиката во Македонија се разликува од стандардите во Словенија.
Обвинетите во случајот, покрај Васев, се уште двајца онколози обвинети за несовесно лекување на пациентите. Судењето продолжува со сослушување на дополнителни вешти лица, а на дневен ред е оценка на протоколите и стандардите за терапија на Клиниката за онкологија.