Деканот на Факултетот за физичко образование при Универзитетот во Белград изјави дека академската заедница е подготвена да го брани универзитетот, оценувајќи дека државата се однесува „како да сме непријатели“, по неодамнешниот полициски упад во Ректоратот.
Деканот Воја Радовановиќ рече дека не само деканите, туку и вработените и студентите се подготвени да застанат во одбрана на институцијата, во услови на зголемени тензии меѓу властите и универзитетот.
Контроверзиите следуваат по акцијата на српската криминалистичка полиција, која на 31 март влезе во зградата на Ректоратот во рамки на истрага поврзана со смртта на 25-годишна студентка. Дел од академската јавност го оцени потегот како нарушување на универзитетската автономија.
Реакции пристигнаа и од декани на факултети од Универзитетот во Нови Сад, кои го осудија упадот како удар врз достоинството на академската заедница.
Во меѓувреме, ректорот на Универзитетот во Белград, Владaн Ѓокиќ, изјави дека би размислил за кандидатура за претседател на Србија доколку добие поддршка од студентите и граѓаните, што дополнително ја продлабочи политичката димензија на кризата.
Тензиите се засилија и по остри изјави од владини претставници, кои ги критикуваа универзитетите и студентските протести, додека академската заедница предупредува на притисоци и заплашување.
Настаните отворија поширока дебата за односот меѓу државата и универзитетите во Србија, особено околу прашањето на автономијата и улогата на академските институции во време на политички кризи.