Цените на нафтата нагло пораснаа, а глобалните берзи паднаа откако американскиот претседател Доналд Трамп најави дека САД ќе го погодат Иран „исклучително силно“ во наредните две до три недели, продлабочувајќи ја загриженоста за долготраен конфликт и нарушени енергетски испораки.
Брент нафтата скокна за 6,5% на 107,70 долари за барел по говорот, додека американската WTI достигна околу 105,70 долари, зголемување од 5,5%.
Трамп, говорејќи од Белата куќа, ги повика другите земји зависни од блискоисточната нафта да преземат улога во одржувањето на отвореностa на Ормутскиот теснец – клучна поморска рута низ која поминуваат околу 20% од глобалните енергетски испораки.
Теснецот е практично блокиран од почетокот на конфликтот, откако Иран се закани дека ќе напаѓа бродови како одговор на американските и израелските удари.
Аналитичарите велат дека изјавите на Трамп ги намалиле очекувањата за брзо примирје.
„Ова е јасен сигнал за пазарите по претходниот оптимизам дека примирје е блиску“, рече Алберто Белорин од InterCapital Energy, додавајќи дека нормализацијата на ситуацијата може да потрае „месеци, а не недели“.
Тина Солиман-Хантер од Macquarie University оцени дека инвеститорите сега очекуваат продолжување на војната, што ќе го задржи притисокот врз снабдувањето со нафта.
Азиските берзи остро паднаа по говорот, бришејќи ги претходните добивки. Јапонскиот индекс Nikkei 225 падна за повеќе од 2%, јужнокорејскиот Kospi за 4,5%, додека Hang Seng во Хонг Конг загуби 1,4%.
Регионалните пазари се особено чувствителни на конфликтот, бидејќи Азија во голема мера зависи од енергенси од Блискиот Исток.
И фјучерсите на Волстрит сигнализираа пад на отворањето, при што Dow Jones и S&P 500 беа пониски за околу 1%, а Nasdaq за 1,4%.
Аналитичарите велат дека неизвесноста околу времетраењето на конфликтот и иднината на Ормутскиот теснец останува клучен ризик за глобалните пазари, со потенцијал да ја задржи цената на енергијата висока и да ја притисне светската економија.