Бугарија влегува во изборен молк пред предвремените парламентарни избори на 19 април, додека подготовките за гласањето ги одбележаа стотици последни смени на членови на избирачките комисии и стравувања од долги редици во дел од гласачките места во странство.
Гласањето во странство веќе почна во Нов Зеланд, каде поради временската разлика први се отворија избирачките места во Оукланд и Крајстчерч. Бугарските власти предвидоа вкупно 493 избирачки места во 55 држави, додека машинско гласање е обезбедено во 130 секции во 19 земји.
Во Обединетото Кралство, каде живее бројна бугарска заедница, се очекува зголемен притисок врз избирачките места, особено во Лондон, поради намалениот број секции и потребата голем дел од гласачите да пополнуваат декларации на лице место, според бугарските медиуми.
Дополнителен проблем се појави и во Благоевград, каде во последните денови се регистрирани стотици откажувања на членови на секциските избирачки комисии. Локалните изборни власти предупредија дека дел од замените не поминале формална обука, што може да создаде тешкотии во изборниот ден.
Промените во изборните правила, усвоени во февруари, го ограничија бројот на избирачки места надвор од Европската унија и надвор од дипломатско-конзуларните претставништва на најмногу 20 по земја, потег што предизвика критики дека ќе го отежне гласањето на дијаспората.
Во меѓувреме, бугарските институции порачаа дека изборните материјали и машините се доставени навреме и дека дипломатските претставништва се во контакт со локалните власти за да се обезбеди нормално спроведување на гласањето.
Изборите на 19 април се уште еден тест за политичката стабилност на Бугарија, која продолжува да се соочува со долготрајна криза и серија предвремени изборни циклуси.