Американскиот претседател Доналд Трамп соопшти дека го продолжува прекинот на огнот со Иран до моментот кога Техеран ќе достави предлог и разговорите ќе завршат, иако претходно најавуваше дека не сака ново продолжување на примирјето.
Одлуката доаѓа на барање на Пакистан, кој посредува во обидите за нова рунда директни разговори меѓу двете страни, но американската делегација предводена од потпретседателот Џеј Ди Венс засега не отпатува за Исламабад.
И покрај продолжувањето на примирјето, Вашингтон соопшти дека ќе ја задржи поморската блокада на иранските пристаништа, потег што Техеран го оценува како неприфатлив услов за натамошни преговори. Ирански претставници порачаа дека нема да преговараат „под сенка на закани“, додека иранскиот амбасадор во Обединетите нации изјави дека разговорите би можеле да продолжат ако блокадата биде укината.
Трамп, кој претходно го обвини Иран за повеќекратно кршење на примирјето, рече дека американските сили ќе останат подготвени, додека тензиите околу Ормутскиот теснец и понатаму ја зголемуваат неизвесноста во регионот.
Во меѓувреме, британски и француски претставници свикаа состанок со воени планери од повеќе од 30 земји за можностите за повторно отворање на Ормутскиот теснец, кој е клучен за глобалното снабдување со нафта и гас.