Премиерот Христијан Мицкоски денеска во Охрид, на свечената академија „Од слово до вечност“ по повод 24 Мај – Денот на сесловенските просветители Свети Кирил и Методиј, порача дека без образование нема силна држава и дека иднината на Македонија зависи од знаењето, културата и духовноста.
Во обраќањето во црквата „Св. Софија“, Мицкоски рече дека постојат народи кои опстојуваат преку словото, книгата и образованието, а не преку војни и територии.
„Словото е паметење. Словото е идентитет. Словото е духовен дом на еден народ“, истакна премиерот.
Тој нагласи дека делото на Свети Кирил и Методиј не е само историски настан, туку „победа на светлината над темнината и на знаењето над покорувањето“.
Мицкоски предупреди дека современиот технолошки напредок носи и опасност од духовно осиромашување и губење на вредностите.
„Денес повеќе од кога било ни е потребно образование кое нема да создава само луѓе со дипломи, туку луѓе со вредности, карактер и критичка мисла“, рече тој.
Премиерот се осврна и на актуелната дебата за употребата на јазиците при полагањето на правосудниот испит, нагласувајќи дека е подготвен за разговори, но во рамките на Уставот и законите.
„Немам никаква задршка да се разговара на темите за употребата на јазиците и секоја заедница да го има правото да напредува и да го употребува својот јазик, сè додека се почитува нашиот идентитетски белег – македонскиот јазик“, изјави Мицкоски.
Тој најави дека наскоро ќе биде постигнато решение кое „сите треба да го поддржат“ и кое ќе ги надмине партиските и политичките интереси.
Во говорот Мицкоски упати критики и до делови од обвинителството, оценувајќи дека правдата се испорачува бавно.
„Трпението е при крај и правдата ќе ги стигне сите“, порача премиерот.
Тој рече дека нема да молчи кога институциите не реагираат и кога, како што наведе, „фиоките се полнат со пријави и тужби“.
Мицкоски се осврна и на односите со Бугарија, велејќи дека не може да ги оправда домашните политичари кои, според него, делуваат како „специјални пратеници на соседната држава“.
„Нема пари, нема моќ и нема причина поради која би го предал мојот народ“, истакна премиерот.
Тој повика на „народно и интелектуално обединување“ и оцени дека ова е „последна шанса за Македонија“.
„Мора да бидеме генерација што ќе создава, што ќе учи и што ќе ја исправи Македонија со знаење, достоинство и самодоверба“, рече Мицкоски.
Говорот го заврши со порака дека империите се рушеле, границите се менувале, но словото останувало.
„Народ што има слово, култура и образование – никогаш не е мал народ“, порача премиерот.