Германија јавно ги поддржа предлозите за реформа на процесот на проширување на Европската Унија, со цел да се забрза европскиот пат на Украина и да се внесе нова динамика во процесот што со години е во застој.
Според предлогот на германскиот канцелар Фридрих Мерц, Украина прво би добила „асоцијативно членство“ во ЕУ, што би ѝ овозможило да присуствува на самити и состаноци на Советот на ЕУ, како и да назначува еврокомесар и европратеници, но без право на глас.
Истовремено, Киев би добивал постепен пристап до европските политики и до единствениот пазар, во замена за усогласување на законите и регулативите со европските стандарди.
Откако ќе ги исполни условите, Украина би преминала кон полноправно членство со сите права што ги имаат земјите-членки.
Германски владин претставник изјави дека идејата за „асоцијативно членство“ е „меѓучекор кон полноправно членство“, а не негова замена.
„Целта е да се забрза пристапувањето, а не да се понуди алтернатива на членството“, изјавил германскиот претставник.
Мерц испратил писмо со предлозите до претседателите на Европската комисија и Европскиот совет, со цел „да се внесе нова динамика во пристапниот процес“.
Берлин смета дека во Европската Унија постои замор од проширувањето, но и разочараност кај земјите-кандидати поради бавниот напредок.
Последна земја што се приклучи на Унијата беше Хрватска во 2013 година, а некои држави преговараат повеќе од една деценија.
По руската инвазија врз Украина во 2022 година, проширувањето повторно стана стратешки приоритет за Брисел, а Украина и Молдавија добија кандидатски статус.
Украина бара забрзано членство до 2027 година, како дел од можен мировен договор со Русија, но процесот повеќепати беше блокиран од поранешниот унгарски премиер Виктор Орбан.
Европската комисија претходно разгледувала и идеја за т.н. „обратно проширување“, според која Украина прво би станала членка, а потоа би ги спроведувала реформите, но земјите-членки категорично ја одбиле таа опција.
Украинските власти првично негативно реагирале на германскиот предлог, особено поради формулацијата за „симболични придобивки“, нагласувајќи дека остануваат фокусирани исклучиво на полноправно членство.
„Свесни сме дека украинското раководство мора да испорача резултати и пред сопствената јавност. Затоа сметаме дека мора нешто да се преземе“, изјавил германски претставник.