Министерството за Европа и надворешни работи на Албанија реагираше по медиумските извештаи за можно дипломатско преместување на амбасадорот на Албанија во Северна Македонија, Денион Меидани.
Дел од медиумите претходно објавија дека Меидани би можел предвреме да ја заврши мисијата во Скопје и да биде назначен за амбасадор во Косово, додека Петрит Малај би дошол на негово место во Северна Македонија.
Во официјална реакција, портпаролот на албанското МНР, Алтео Хиси, соопшти дека дипломатските движења се спроведуваат согласно законите, регулаторната рамка и дипломатските практики.
„Овие процеси се засноваат на професионална и институционална анализа, со цел најефикасно користење на човечките ресурси, во согласност со приоритетите на надворешната политика на Република Албанија“, се наведува во реакцијата.
Од Министерството додаваат дека одлуките се носат во координација со надлежните државни институции.
Алтео Хиси оцени дека медиумските коментари и извештаи „не ја одразуваат реалноста, а уште помалку институционалниот процес“.
„Претпоставките или толкувањата презентирани како факти се целосно неосновани и не заслужуваат понатамошно внимание“, стои во реакцијата.
Темата за амбасадорот Денион Меидани се актуализираше по реакциите и политичките дебати поврзани со протестите на албанските студенти во Скопје и прашањето за употребата на албанскиот јазик.