Амбасадорот на Европската Унија во Северна Македонија, Михалис Рокас, порача дека Европа е изградена врз ветувања, слобода, еднаквост и демократија, вредности кои, како што рече, мора да се бранат и денес, во време на конфликти и економски притисоци.
Рокас ова го истакна на свеченоста по повод 9 Мај – Денот на победата над фашизмот и Денот на Европа, што се одржа во владин круг во Скопје.
„Ова е ден кога треба да ја нагласиме и стратешката важност на проширувањето на Европската Унија, со цел обезбедување долгорочен мир, просперитет и безбедност на континентот“, рече Рокас.
Според него, проширената Европска Унија значи поголема геополитичка отпорност, посилна енергетска независност и поголема тежина на заедничките европски вредности.
„Една проширена ЕУ значи поголема геополитичка отпорност, засилена енергетска независност, подобрена безбедност, но и поголема тежина на нашите заеднички вредности во турбулентните конфликти“, изјави амбасадорот.
Тој го спомена и обраќањето на претседателот на Европскиот совет, Антонио Кошта, кој, како што рече, ѝ се обратил на Северна Македонија како на идна членка на Европската Унија.
„Знаеме дека заедно, со помош на сите вас и со континуираните реформи, ќе успееме да го направиме клучниот чекор за да ја донесеме државата таму каде што припаѓа – во семејството на Европската Унија“, рече Рокас.
Во говорот, амбасадорот оцени дека 9 Мај е симбол на крајот на најкрвавиот конфликт во историјата на човештвото и почеток на нова ера за Европа.
„Денес ја поздравуваме храброста и жртвата на оние кои се бореа и ги дадоа своите животи. Не го одбележуваме само крајот на војната, туку и раѓањето на Европската Унија“, истакна Рокас.
Тој додаде дека денешниот контекст, особено руската агресија врз Украина, потсетува колку е важно зачувувањето на европските вредности.
„Мора да го поздравиме борбениот дух на Украинците, но и борбата за слобода на сите нас во Европа. Ова не е само за Украина, туку за Европа и Европската Унија во целина“, рече Рокас.
Амбасадорот ја пофали Северна Македонија за поддршката што ѝ ја дава на Украина во изминатите години.
По обраќањето, Рокас положи цвеќе пред споменикот „Ослободителите на Скопје“.