Европската банка за обнова и развој и Европската унија обезбедија финансиски пакет од 5 милиони евра за Прокредит банка во Северна Македонија, наменет за поддршка на бизниси предводени од жени и млади претприемачи.
Пакетот се состои од два заема од по 2,5 милиони евра, еден во рамки на програмата „Жени во бизнисот“ и еден во рамки на програмата „Млади во бизнисот“.
Средствата ќе бидат пласирани кон микро, мали и средни претпријатија што ги водат жени или претприемачи помлади од 35 години.
Од ЕБОР велат дека целта е да се подобри пристапот до долгорочно финансирање за групи кои сè уште се соочуваат со структурни бариери во финансискиот сектор.
Европската унија ги поддржува двете кредитни линии преку техничка помош и гаранции во рамки на Европскиот фонд за одржлив развој плус.
„Поддршката за жените и младите во бизнисот е клучна за градење поинклузивни, поотпорни и поконкурентни економии“, изјави Фатих Туркменоглу, шеф на ЕБОР во Северна Македонија.
Од Прокредит банка оценија дека новата соработка ќе помогне во создавање повеќе успешни бизнис-приказни во 2026 година и ќе придонесе за одржлив економски развој.
Амбасадорот на ЕУ, Михалис Рокас, изјави дека проширувањето на пристапот до финансии за жените и младите претприемачи е важно за отворање работни места, зајакнување на локалните заедници и поинклузивен раст.
Прокредит банка е долгогодишен партнер на ЕБОР и еден од водечките кредитори на микро, мали и средни претпријатија во земјата.
ЕБОР досега инвестирала повеќе од 3 милијарди евра во над 210 проекти во Северна Македонија.