Околу два милиони граѓани на Косово имаат право на глас на предвремените парламентарни избори што се одржуваат денеска, 7 јуни, трети избори за помалку од година и пол.
Во трката учествуваат 22 политички партии и три предизборни коалиции, со надеж дека новото гласање ќе стави крај на институционалната блокада што ја парализира земјата.
Политичките аналитичари гледаат три можни исходи: концентрација на власта кај Самоопределување, принуден политички компромис или продолжување на кризата со ризик од нови избори.
Претходните избори не успеаја да обезбедат стабилни институции. Иако Самоопределување на Албин Курти освои над 51 процент од гласовите на изборите во декември, не беше постигнат договор за избор на претседател, што доведе до распуштање на Собранието.
Аналитичарите предупредуваат дека продолжувањето на кризата може сериозно да го забави европскиот пат на Косово, да ја намали довербата на граѓаните и да ги загрози фондовите и инвестициите од ЕУ и САД.
Претседателот на Европскиот совет, Антонио Кошта, при посетата на Приштина порача дека „ЕУ не може да ја заврши домашната задача на Косово“, нагласувајќи дека земјата има потреба од стабилни и функционални институции.
Клучното прашање по изборите не е само кој ќе победи, туку дали Косово конечно ќе може да се управува.