Европскиот парламент со големо мнозинство ги усвои годишните извештаи за напредокот на петте земји од Западен Балкан на нивниот пат кон членство во Европската унија, при што Црна Гора, Албанија и Босна и Херцеговина добија најсилна поддршка од европратениците.
Извештајот за Црна Гора беше усвоен со 486 гласа „за“, 101 „против“ и 75 воздржани, што претставува најголем број гласови за меѓу петте земји опфатени во пакетот за проширување. Европратениците го поздравија континуираниот напредок на земјата во спроведувањето на реформите и нејзината амбиција да ги заврши пристапните преговори до крајот на 2026 година.
Албанија доби 483 гласа „за“, 103 „против“ и 70 воздржани. Европскиот парламент оцени дека земјата бележи брз напредок во последните години, но предупреди дека политичката поларизација, владеењето на правото и борбата против корупцијата остануваат клучни предизвици.
Извештајот за Босна и Херцеговина беше усвоен со 478 гласа „за“, 116 „против“ и 54 воздржани. Европратениците ја потврдија поддршката за европската перспектива на земјата, повикувајќи на надминување на политичките блокади и забрзување на реформите.
Косово доби помала поддршка во споредба со останатите земји, со 412 гласа „за“, 174 „против“ и 58 воздржани. Парламентот ја поздрави посветеноста на Косово кон европската интеграција, но изрази загриженост поради политичкиот застој и недоволниот напредок во формирањето стабилни институции.
Извештајот за Северна Македонија беше усвоен со 411 гласа „за“, 120 „против“ и 120 воздржани, што е најголем број воздржани гласови меѓу сите земји од Западен Балкан. Европратениците ја повторија поддршката за членството на земјата во ЕУ, но нагласија дека понатамошниот напредок зависи од спроведувањето на реформите, борбата против корупцијата и усвојувањето на уставните измени неопходни за отворање на првиот кластер од преговорите.
Гласањето во Европскиот парламент покажува дека Црна Гора, Албанија и Босна и Херцеговина уживаат најширок политички консензус меѓу европратениците, додека Косово и Северна Македонија се соочуваат со поголем скептицизам и поделени ставови во рамките на законодавниот дом на ЕУ.